荷甲今晚煞科，護級形勢已定，海牙篤定降班，而精英隊與華域克則要打護級附加賽，今晚焦點自然落在爭標三雄身上。投注方面，羅賓要提醒大家，近季荷甲煞科主隊勝出率唔高，反映唔興主場謝幕呢一套，所以唔好盲目捧主隊。（荷甲九場賽事全部周日晚8時30分開賽）
阿爾克馬爾、阿積士與燕豪芬目前同得七十二分，一般估計今季冠軍誰屬要靠得失球判定，預期三雄會盡炒對手，所以馬會三場「讓球主客和」都要讓到兩球，羅賓唔排除會三場都開晒「讓球勝」，不過重心投注決定放三隊「半場勝」身上，三串一乘埋接近2.7倍算好分。
阿爾克馬爾攻力強勁
阿爾克馬爾得失球差佔有優勢，分別領先阿積士六球及燕豪芬七球，原則上只要今仗作客擊敗精英隊就穩奪聯賽冠軍，主動權晒自己手上，以佢聯賽平均每場入接近兩球半攻力，要大勝需要留力打護級附加賽精英隊，相信難度唔高，係榜首三雄中最有機會開「讓球勝」一隊；再睇番阿爾克馬爾聯賽廿一場勝仗中，有十六場半場已經領先，今仗不妨再跟半場勝。
阿積士燕豪芬形勢被動
另外兩場阿積士作客威廉二世及燕豪芬主場對維迪斯，雖然兩隊得失球落後太多，但相信唔會就咁放棄，點都會盡力而為，有理由支持佢會一開波就強攻，所以羅賓相信呢兩隊都可以開出半場勝。不過足球係互動，若然佢半場入到更衣室，聽到阿爾克馬爾已經贏梗，下半場仲會唔會搏真係一個疑問，分分鐘放軟手腳畀對手追番都唔定，所以「讓球勝」甚至齋W都唔穩，最佳投注策略始終係「半場勝」。
