红魔鬼“魔性”大发，喺欧联踢出慑人气势后上砌低AC米兰，球员一定要有超乎常人嘅坚定赢波决心，先至能够踢得出呢股气势，可想而知家阵曼联球员扯晒火，爱华顿喺呢个时间要做拦路马好难啦！曼联上场英超对米堡大意失两分，好在车仔又唔生性无乘机追贴，虽然红魔鬼后防闹兵荒，领队费格逊就将“进攻便是最佳防守”嘅作战意识发挥到淋漓尽致，对付AC米兰就係最佳典型例子，最重要係朗尼有番晒射门触觉同信心，加上C朗人逢喜事精神爽，前线攻击无论喺速度、射术同默契都一流，攻击力倍增，可以好有效抵消后防所承受嘅压力，依家转入争英超冠军终点前最后直路，加上往绩对“拖肥糖”占尽上风，红魔鬼以赢波振奋士气喺欧联做客AC。当然爱华顿都要争分抢下届欧洲赛席位，做咩会放水先？但係偏偏上场就无厘头咁输畀韦斯咸，斗心值得怀疑，唔及明刀明枪嘅曼联。
已经保持联赛四场不败嘅阿仙奴，番到酋长球场唔会再犯面对热刺嘅完场前错误，而且实力又较富咸高出一班，相信阿仙奴呢场可以轻松赢波。北爱领队山齐士上任后，富咸近况依然无起色，近十场联赛未赢过，而且不擅做客平均每场都失两粒，咁嘅豆付防线点顶得住主队潮水式攻势。兵工厂已经领先第五名爱华顿有九分，呢场赢埋就肯定进入下赛季欧联赛场，战意亦毋须怀疑，之前连赢两轮主场走出谷底，年青球员有番晒信心，可以继续惯性恰死富咸，兼为首循环输波报仇！
爱华顿 ＋0.5/1 曼联 推介：曼联
阿仙奴 -1/1.5 富咸 推介：阿仙奴
