去到四月尾，歐洲各大聯賽真正殺入尾段，意甲已出王者，英超、西甲同德甲，聯賽前列分子仍然爭崩頭，未到最後一刻都未知鹿死誰手。其中西甲幾支勁旅都有跌Watt象，皇馬持續表現不穩，今晚作客巴斯克球隊畢爾包有暗湧，Peter睇好主隊可以偷雞保持不敗，「讓球主勝」有1.85倍抵玩。
西甲上兩季王者巴塞隆拿，今季演出明顯退步，朗拿甸奴狀態不足，伊度奧又傷半季兼同頭列卡特不和，雖有美斯崛起，但整體戰鬥力真係削弱。西維爾要應付三條戰線，相信最終都難以問鼎王座，而皇馬更全季未踢出霸氣。依家「銀河艦隊」只同榜首巴塞差兩分列第三，但預計佢會繼續失分。畢爾包目前仍有降班危機，一定要全力搶分護級，而佢主場一向夠惡，近兩仗分別打敗愛斯賓奴同華倫西亞，今晚可以食住上。
港澳球迷七月飽眼福
英超方面，富咸同樣要為護級搏老命，阿仙奴第四位置好穩陣，主場對「倫敦細佬」可能會放佢一馬。
南華苦盡甘來，七年後再度奪得聯賽冠軍，實在可喜可賀，亦為一眾擁南躉而高興。另外，七月中開始陸續有歐洲勁旅如利物浦、曼聯等來港澳獻技，該段時間已屬季前熱身階段，相信球星們都會隨隊，港澳球迷今次有眼福喇
