荷甲倒數最後兩輪，九場賽事統一開波時間，冠軍、歐洲賽入場券及護級三個戰場均未有落實結果，因此十八支球隊，只有川迪、維迪斯、鹿特丹斯巴達及海牙四隊係例行公事，今晚每一戰都足以改寫大局。（周日晚８時30分開賽。）
燕豪芬、阿爾克馬爾及阿積士三隊仍然為爭冠作最後努力，燕豪芬暫時以兩分之微領先雙雄，一般估計今晚三隊都會繼續贏，呢條三串一熱Ｗ可能會係唔少人例飛。不過，羅賓就有保留，建議大家簡單買單頭阿積士「讓球勝」。
燕豪芬衰在熱唔透
睇番三場賽事，燕豪芬作客烏德勒支，客Ｗ有1.62倍略嫌太好分，隨時係陷阱。事實上佢近期攻力真係麻麻，上仗贏川迪全因對手一時太急，畀法芬閃電入兩粒奠勝，多少帶點幸運成分。翻查佢作客已連續三場失分，面對今季主場僅兩敗烏德勒支，真係有暗湧。
阿爾克馬爾遇豬頭骨
阿爾克馬爾主場對海倫芬，後者如果保持到目前第五，就可以爭歐聯附加賽入場券，而且近六仗四勝二和不敗，戰意及狀態都足夠，主隊要過呢關唔容易，主Ｗ得1.45倍真係唔抵買。
相對之下，阿積士對鹿特丹斯巴達讓得最辣，「讓球主客和」要讓二球，即係淨贏三粒先有錢收，不過佢攻力足，近五場入十六球，而榜首三強中又以阿積士得失球最差，難得對住冇爭對手，有力大勝一場收復失地
