離開阿仙奴後，亨利早前已正式於巴塞跟操，根據主帥列卡特透露，今場賽事會畀佢落場，由於呢位法國射手傷愈冇耐，預計唔會打足全場，但有機會拍住伊度奧同朗拿甸奴，三位世界一級攻擊球員聯手，呢個恐怖攻擊鐵三角實在令人相當期待，可以預期，速度同侵略性都極強，登地聯根本冇能力頂得住。
二線兵新秀一樣咁勁
今場賽事係巴塞首場熱身賽，球員狀態難免不足，隊中缺陣主力名單水蛇春咁長，包括出戰美洲國家盃球員美斯、米列圖、艾美臣及馬基斯，以及十字軍佩奧爾同古莊臣等。主力缺陣造就新兵上位，耶耶托尼同艾比度都有機會落場，隊中二線兵艾斯基路同麥斯盧比斯亦要爭取表現保住飯碗，鬥志唔使懷疑。
貴為世界其中一個青訓王國，巴塞小將個個打得，墨西哥「細哨」杜斯山度士分量十足，另一年輕射手卡傑錫亦屬超級入球機器，兩大新星如果後備落場，威脅力分分鐘勁過班主力。登地聯屬蘇超下游分子，實力非常一般，今次只係做陪練，畀班球員同一級球星切磋，心態都係輸少當贏，同埋等散場交換波衫。
半場W及大盤可試
登地聯過往四次同巴塞交手贏晒，不過係六六年同八七年事，今次巴塞可望復仇成功。由於客W冇肉食，需要調整投注策略，預計巴塞上半場陣容較完整，領先機會好大，宜以半場客W做重心，基於兩軍實力有距離，料會大手交易，大盤亦可兼顧。
