曼聯上場對FC深圳大開殺戒之後恐怕未夠喉，今晚對FC廣州係亞洲之旅最後一站，紅魔鬼要尾彩一定唔會流攤，上場既然開得出「客其他」，今次都係大炒格，一於再追熱賣2.9倍「客其他」！（無明珠台及廣東電視體育頻道周五晚8:00直播）
曼聯去到廣州受歡迎就梗，但估唔到操練就已經搞到大混亂，成班球迷衝晒落球場，搞到曼聯都嚇一跳，你話紅魔鬼呢場波唔交足功課話真係暴動都似，曼聯焗攻入球唔荒少，入球大組合真係瓣瓣都玩得過。再講，大家睇新聞都見朗尼練習賽有幾搏啦，左剷右剷連自己友都唔放過，呢隻牛精仔家陣火氣十足，落到場真係勒都勒唔住。
董方卓正選上陣
雖然有消息話C朗拿度賽前有傷，但佢師弟拿尼表現唔錯，上場處子戰就有波入，今場有機會落場一定會再交出表現。領隊費格遜仲記招話明今場會畀董方卓正選上陣，廣州班同胞見董方卓有機會光宗耀祖，呢場當然識做畀佢入波搶風頭。
其實廣州隊都預呢場對曼聯要輸波，佢話輸幾多唔緊要，最重要都係交出表現，展現球隊風格，但講番曼聯近兩場熱身賽派十隻蛋，去到邊度都冇面畀，加上佢踢埋呢場就結束亞洲之旅，臨走前梗係會入多幾球靚波畀大家欣賞下，順便報答球迷支持，咁情況之下，入球當然係源源不絕啦！
