話咁快曼聯亞洲行去到尾站，「紅魔鬼」今晚殺入廣東奧林匹克體育中心，同主人家ＦＣ廣州（廣州醫藥）交手。賽前主帥費格遜講明會派中國國腳前鋒董方卓踢正選，鋒力肯定銳減，班球員仲澳門蒲完，尾站作戰心態鬆懈，隨時交行貨，咪畀之前靚績呃，大細中位數為4.5球，吼「細」盤穩陣！（無明珠台周五晚８時直播）
「紅魔鬼」訪穗遇上熱情球迷，fans試過衝入球場，一度阻礙操練進行，不過班球星見慣大場面，情緒唔會受太大影響。去到中國獻技，費Sir當然識做，賽前記者會保證中國球星董方卓會正選上陣，「小董」能力去到邊，大家心知肚明，有呢個同胞幫手「清波」，ＦＣ廣州班守將安心得多。
濠江戰罷全軍放縱
另外，曼聯球員澳門站終於忍唔住出動夜蒲，費Sir食翅陣，一眾球星齊齊殺入夜場狂歡，卡域克同費查等球星都有落，大家各自各精彩。至於朗尼仔濠江畀狗仔隊辣%26#63514;，去到廣州全程黑口黑面，心情似乎仲未平復，今晚唔慌落力。大軍作戰情緒冇晒，今晚點會搏命！
曼聯亞洲行一站比一站好，上場行住都大數ＦＣ深圳六蛋，今次對住中甲榜首球隊ＦＣ廣州，好多人會瞌埋眼玩「客其他」。不過，廣州站只係臨時加開，球會重視程度肯定唔及之前三站，加上球員開始心散，今晚「流攤」機會極高，玩細盤好過！
