巴甲目前爭持激烈，頭三位相差只有四分，排第三甘美奧周日清晨主場對帕拉尼恩斯，正係拉近同榜首保地花高距離好機會，因為對手帕拉尼恩斯今季同個「贏」字似乎好冇緣分，可以話係「逢四進一」，而且近期作客更加係佢死穴，甘美奧齋W夠晒穩。（now 631周日清晨５時10分直播）
甘美奧季初因為分心踢自由盃，一度令聯賽成績受影響，不過自從自由盃決賽輸波之後，甘美奧全力應付聯賽已漸入佳境，近八場聯賽未嘗一敗，取得五勝三和，期間只失兩球，等閒之輩都幾難可以阻止佢目前強勁走勢。
帕拉尼恩斯好睇唔好食
至於客軍帕拉尼恩斯，延續上季有前冇後踢法，好睇唔好食，入波多當然受球迷歡迎，但成績通常唔好。另外，帕拉尼恩斯今季最大特色係「逢四進一」，自從開咧兩連勝後，連續四場失分至再贏波，呢個情況其後緊接再出現一次，用呢個走勢推論，帕軍近兩仗一和一負，睇怕仲會再衰兩場，先有機會再嘗勝果。
