英超仲有唔夠一個月就開鑼，球隊近期紛紛約戰熱身賽，場面夠晒熱鬧，今晚紐卡素主場迎戰些路迪，雖然些路迪係上季蘇超冠軍，不過中場大腦中村俊輔不在陣中實力起碼減半，紐卡素新帥艾拿戴斯首次主場領軍出擊，當然想贏波立威，主W值得支持。（now 631周五凌晨2時45分直播）
「喜鵲」今季高層出現大變動，除領隊由前保頓主帥艾拿戴斯接手，周二亦剛剛宣布會由基斯莫特取代舒柏特出任球會主席，自從舒柏特將手上股份賣畀富商艾殊利之後，佢球會話事權已名存實亡，被炒早係意料之內，艾拿戴斯加盟以都係睇艾殊利台戲，所以樂比仔認為今次換主席，對球隊士氣同未來發展方針會帶正面影響。
紐卡素開操以來先後踢兩場熱身賽，分別作客擊敗哈特普爾同打和卡素爾，今次係本季首次於聖占士主場出擊，亦係艾拿戴斯正式領軍後首場主場比賽，當然希望以贏波作為見面禮喇。
紐卡素今季換唔少新球員，新加盟有前鋒維度卡、中場祖爾巴頓、謝列美同後羅辛奴，個個有一定分量，雖然祖爾巴頓及奧雲受傷缺陣、維度卡剛踢完亞洲盃料會休息，但其餘主力杜夫、占士米拿、馬田斯都可列陣，實力仍有相當保證。
些路迪人腳唔齊
蘇超比英超早一個星期開咧，講備戰態度些路迪應該比紐卡素更認真，可惜陣中主力、上季蘇格蘭三料足球先生中村俊輔因為代表日本踢亞洲盃仲未歸隊，實力大為削弱，加上球隊去完美國踢熱身賽，舟車勞頓對球員身心點都有影響，主隊以逸待勞有數。
