荷甲護級附加賽又啦！華域克今晚主場迎戰芬洛，唔似可以收復首回合落後兩球失地，事關華域克主場平均入座唔夠六千個球迷，聲勢惡極有限，加上佢陣中有三件主力係借將，隨時走得，護級鬥心唔慌好得去邊，不如冷敲芬洛再次收錢，開鋪「讓球客勝」益街坊。（開賽時間：周五凌晨2:00）
芬洛近10場作客僅2負
首回合華域克作客淨輸○比二，但佢近七場主場有五勝兩和，計落仲有本錢絕地反擊。可惜，華域克係荷甲蚊型球會，主場最多坐得七千五百個擁躉，近年平均入座唔夠六千人，就算坐爆都嚇唔到對手，呢場要佢球迷壓力下主動搶攻，牙煙！
仲有呀，由於財力有限，目前華域克有四個球員係外借返，當中波圖前鋒錫克迪奧爾、阿爾克馬爾箭頭伊基迪亞、阿積士後防維頓漢仲係重心球員，淨得安德列治後基治係大後備，降班？似乎唔多關佢事喎，橫掂都要走啦！芬洛近十場作客有七勝一和兩負，不敗率達八成，當然唔會扯白旗投降
