今日日聯盃分組賽煞科，名古屋八鯨、磐田山葉同神戶勝利船已被K.O.，捧對家數。千葉市原剛於主場被廣島三箭技術性擊倒，今次殘陣作客三箭好似唔多樂觀，但蘇豪認為市原有力反彈，皆因球隊近兩季於日聯盃三對三箭都贏晒，加上三箭主弱客強，「讓球客勝」有計！（周三下午6時開賽）
三箭上周末作客輕取市原，巴西射手烏士利上半場轟入三球，第八次於日職大演帽子戲法，踢落完全唔同級數。事隔四日照計市原難反彈，但三箭不嬲主弱客強，今季聯賽連盃賽主場八戰只曾兩勝，烏士利同佐藤壽人聯賽加埋入十八球，得四球於主場取得，可見球隊主場出戰並無優勢。
現與三箭同分
市原近九場賽事只曾一勝，包括於日聯盃兩連敗，導致出線形勢告急，狀態明顯麻麻。不過，球隊連奪兩屆日聯盃，掛住大大個金漆招牌，當然並非浪得虛名，會方一心爭取三連霸，球員去到關鍵時刻實會搏命。目前市原於A組同三箭同分，今場只要保持不敗，預計可以順利出線。
市原中後場面對嚴重傷停問題，羽生直剛同佐藤勇人因傷避戰，下村東美則要停賽，防線尼納佐積域停賽，史杜恩諾夫同奧運腳水本裕貴齊養傷，個陣的確好殘，但呢類盃賽專家經常能人所不能，蘇豪相信市原班後備兵交到貨，要「讓球客勝」。
心跳滅鼠博翻身
睇埋B組，清水心跳仲有機會出線，今仗於主場對大宮松鼠，對手守將李安度及波戶康廣要停賽，防線肯定中門大開。心跳今季兩次作客大宮松鼠贏晒，預計可以再滅「鼠」！
