王者決戰，終極上演！王子卡卡今晚會率領AC米蘭，挑戰以「神奇隊長」謝拉特為首利物浦，一雪兩年前慘敗之恥！今晚希臘雅典奧林匹克運動場，見證歐洲王者誕生！（now684台、泰星U39台及廣東電視體育頻道周四凌晨2:45直播）
其實小弟一直都認為，利物浦最弊係欠缺一個可以扭轉乾坤球員。今季紅軍十八次落後，僅得六次可以扳平或者反勝，其餘全部輸晒。面對弱旅，好多時都未能打破僵局。搞成咁，好大原因係謝拉特今季大跌Watt，呢位「神奇隊長」到目前為止只係得十一個入球，當中大部分屬於錦上添花，同佢上季有二十三個入波，每每擔當救世者角色差好遠。
利物浦前鋒唔多識入波
前鋒入球能力弱亦係紅軍致命傷。比拿美同科拿唔使講，就算係首席射手高治，近八仗亦陷入入球荒，點信得過？防線方面，丹尼爾艾格大賽經驗不足，艾比路亞、芬倫亦非可靠之輩，每每面對速度較高側擊球員就即刻見底，畀阿仙奴炒六比三就係一個好例子。
相反，米蘭王子卡卡表現大熟大勇，依家以十個入球成為歐聯神射手，強如曼聯2R亦要俯首稱臣！淘汰賽兩軍以穩陣行先，可以扭轉局勢球員往往會成為關鍵，呢方面，卡卡就比謝拉特可靠得多。加上進攻上有施多夫、恩沙基呢大賽經驗豐富球員配合，防守上有加度素、派路同岩布仙尼等猛將，比起紅軍沙比阿朗素同馬斯真蘭奴，創造力同攔截何止高出一班？值得一提係，九四年AC曾經呢個奧林匹克運動場高舉過歐聯獎盃，今鋪天時地利人和俱備，仲唔係復仇好時機？AC讓平半，小弟撐硬上盤
