今晚英格蘭溫布萊球場迎戰巴西，呢場波外表睇落好似世界大戰，骨子其實未必係咁，因為呢場賽事只屬熱身賽，雙方都可以換好多人，加上正值季尾時分，球員肯定唔會鬥志如虹，隨時求其交貨算數。
奧雲需要高治掩護
歐洲各大聯賽收晒咧，唔少球迷開始餓波，早前同南華元老隊聚頭，唔少人都談論緊呢場大戰，今場主要有兩大焦點，第一，賽事宏偉溫布萊球場舉行，之前Peter都同大家講過，個場草地仲係好鬆，踢落推進唔會好流暢，對兩隊發揮或多或少有影響。第二，碧咸重返英格蘭，「萬人迷」千呼萬喚終於再度入選，今次當然係球迷焦點。
除碧咸，奧雲亦回歸國家隊，呢位射手養傷多時，復出已有一段時間，趁呢個機會，大家可以知道佢狀態恢復成點，睇可唔可以去番全盛時期八至九成。如果今場奧雲打單箭頭，表演空間唔會太多，若果有埋高治做掩護，Peter認為佢有機會取得士哥。到底有番碧咸同奧雲英格蘭會踢成點，相信今晚會有多少眉目。
今仗只屬熱身賽，兩隊戰意成疑，Peter奉勸大家咪玩太大，畢竟餓波還餓波，呢類賽事表演味道濃厚，只係一場玩賽事，開乜戰果都有可能，都係小注為佳，一比一波膽係射程範圍，可以細細玩睇場好波
