「絕代雙驕」碧咸、奧雲回歸國家隊，英格蘭攻擊力當堂倍數激增，其中咸哥回歸更加係焦點所在，話晒佢皇馬歷盡滄桑、苦盡甘來先可以重返英格蘭，今晚梗係要騷「哥利」，同奧雲仔拍住上啦！之不過，英格蘭賽前有里奧費迪南同戴臣兩名後防因傷退隊，後防只係靠泰利哥同加歷查頂住，要博佢贏波，好似唔多穩陣喎！
畀面派對「和」氣生財
至於巴西，今季踢到殘「雙星」朗拿甸奴同卡卡已經去信唔踢美洲國家盃，但今場依然畀面出席，為乜？之唔係想見證新溫布萊球場歷史性一刻，順便慶祝碧咸歸位囉！以佢兩位級數，正好同英格蘭「絕代雙驕」互相輝映，再加上今場仲有「新力星」右閘丹尼爾、「入球機器」艾方素、不來梅中堅拿杜同埋中央陸軍祖奧，都要為入選緊舉行美洲國家盃大軍而努力，唔使擔心佢會流攤喎！
英格蘭話晒係主人家，請巴西返拍跳，無非係想搞噱頭，賀新溫布萊舉行首場國際A級賽事，斷估巴西都唔會咁衰仔，贏波落人面？「和」氣生財咪皆大歡喜囉！
