孖寶半全膽推介
升班附加賽首回合修咸頓主場一比二不敵打比郡，若果「聖人」真係想下季殺上英超，今晚最少要入兩球波先至有計傾！雖然領隊佐治貝利，以及中場舒文不約而同認為球隊有足夠火力來個大翻身，不過修咸頓作客之下仲要鬥攻，隨時進退失據實在唔可以睇好。
修咸頓射手堅韋尼鍾斯打柴
再者，修咸頓本身都有主力缺陣，前鋒堅韋尼鍾斯、後防加里夫巴利同奧斯特隆都首回合受傷，今晚未必出得。尤其係堅韋尼鍾斯今季英冠射入十四球，少佢已經叫球隊頭痕，加上隊中神射手拉斯亞克成兩個月未入過波，另一射手沙根諾斯基都係好番無耐，修咸頓憑乜同人搶胡？
更重要係打比郡唔係流，佢英冠主場有十三勝六和四負，其中只係有四次無入球，可見火力有保證。今場波對住要焗攻修咸頓，真係合晒「何尺」，可望乘對手後防空虛一個反擊得手，連次回合都贏埋。
