歐聯四強首回合上演「英倫打」，利物浦作客車路士受讓平半要捧紅軍。利物浦早就將注意力放於歐聯，近期聯賽以戰養戰狀態一流；相反車仔聯賽搏到盡，波歷克同卡維奴又可能缺陣，加上莫連奴麾下車仔歐聯未入過利物浦波，上盤要唔過！（now 684周四凌晨2時45分直播）
莫連奴同賓尼迪斯同於○四年空降英倫，分別將藍、紅兩軍帶入新紀元，成為近年歐聯成績最好兩支英超球會。因為實力接近，兩隊成為歡喜冤家，今次已經係三季以來第十四次對碰，對手踢法實在熟到爛，今仗難免又係一場拉鋸戰。根據近期雙方碰頭紀錄，利物浦多能以防守性打法壓制對手，成為近兩次於四強盃賽賽事（歐聯及足總盃）都可以淘汰車仔主因。故今次狹路相逢，牌面較弱紅軍心理上反而佔得優勢。
車仔爭四冠心力交瘁
利物浦係盃賽專家，本季聯賽再度早早冇得爭，季尾於聯賽毫無壓力，近三仗鬥曼城、米杜士堡同韋根，都可以畀陣中主力謝拉特、沙比阿朗素、高治及懷斯等休息，以戰養戰實有助提升狀態。另外，賓尼迪斯歐聯食住莫連奴，對上兩屆四次對車路士，取得一勝三和成績，其中車仔一球都入唔到，受讓自然值得捧場。
艾辛停賽波歷克或缺陣
車仔目前仍有機會爭歐洲四冠王，戰線分散搞到心力交瘁。莫連奴都講過，歐聯前一周面對聯賽快車賽程，車仔為追趕曼聯場場搏盡，但利物浦就如踢練習賽一樣，相比之下車仔自然輸蝕。
另外，聯賽鬥紐卡素一仗，波歷克受傷被調離火線；而中堅卡維奴據報亦有傷在身，今仗或有可能缺陣，加上艾辛停賽肯定唔出得，最終或要派近期已列後備馬基列尼同「計時炸彈」保拿奴斯上陣，加上狀態一般祖高爾、未成氣候約翰米基爾，同「托弗」謝拉特、馬斯真蘭奴、沙比阿朗素相比，主場都冇甜頭。另外，車路士於歐聯一向「留前鬥後」，主場贏唔贏到都係其次，首要目標係唔失作客入球，等到次回合先全力出擊，今晚要讓平半唔划算。
