今晚上演歐聯四強首回合賽事爆發英超內訌戰！億萬大軍車路士史丹福橋擺下擂台，迎戰近年盃賽宿敵利物浦。雖然車仔近年英超成績遠勝紅軍，不過盃賽就冇啖好食，加上近年於兩回合制賽事例牌慢熱，首回合唔容易打響頭炮，讓平半梗係要下盤。（now684台、泰星U1及39台、廣東電視體育頻道周四凌晨2:45直播）
如果今晚只係一場聯賽大戰，車路士理應被睇高一線，畢竟近三季賽事當中，於史丹福橋迎戰紅軍三戰全勝，而且一球不失。不過今晚歐聯狹路相逢，情況就截然不同，事關利物浦領隊賓尼迪斯對部署盃賽極有心得，上任短短三季已經先後捧過歐聯、歐洲超級盃、社區盾及足總盃，堪稱盃賽專家。
盃賽畀利物浦恰死
事實上，兩軍自○四年球季起，於所有賽事合共交手十三次之多，車路士曾於英超五次擊倒利物浦，僅負一次，但盃賽就冇晒符，七次對碰竟然冇一次於法定時間內氣走紅軍。佢今戰更有兩大救世主波歷克及艾辛，分別因受傷及停賽未能上陣，加上要分心英超戰線，睇怕車仔都唔易打破盃賽贏唔到紅軍宿命。
更值得留意係車仔近年於主客兩回合制賽事作風，佢近五次首回合四和一負未贏過，即使年頭聯賽盃四強首回合，遇上英乙韋甘比一樣W唔出，認真慢熱到暈；反觀利物浦就充當急先鋒，近五次淘汰賽首回合賽事，共取得四勝一負，單係呢個數據，下盤實屬不二之選
