歐聯四強球隊實力接近，今晚車路士主場鬥利物浦，兩軍非常熟路，了解大家打法，所以踢起會更加謹慎。由於兩位有料頭睇通對方部署，今場靠晒球員臨場執生，勝負關鍵未必係隊中頂級球星，因為佢踢法已被睇通睇透，話唔定會由二線球員建奇功！
前鋒個個都弗
如果今場利物浦擺出高佬陣，派高治面對泰利，咁未必有數，由於隊中三個前鋒狀態都好弗，今場隨便出其二，攻力亦冇問題。球隊一心一意重溫前年奪取歐聯好夢，如果真係成事，就可以挽回所有聲譽。今場「紅軍」既有頑強戰意，亦有以逸待勞之利，憑住呢兩個重點，Peter認為佢首回合可保不敗。
車路士主帥莫連奴賽前放風，話守將卡維奴同中場波歷克未必出得，呢番宣言只可半信，唔少有料頭不時玩心理戰，「虛則實之，實則虛之」，如果今晚兩位「傷兵」趕及落場，Peter絕不感奇怪。此外，如果車路士想贏波，有兩個球員千祈唔好上場，約翰米基爾同沙洛文卡勞都未夠班，係球隊最差一點
