佐加頓斯係瑞超老牌勁旅，前年就第一，上季都排第六，照計對住升班球隊特利堡，聚飛一都唔出奇。不過，力奇想提提大家，佐加頓斯今季演出的確唔算理想，至今踢六場聯賽，只係贏得兩場，仲要係僅入七球失六球，可謂攻不銳守不穩，根本冇晒以前勁旅風範。
主場四戰都有波入
再睇埋今季聯賽客場戰績，踢三場得一和兩負，未贏過，仲要讓波真係搵你要囉！
主隊方面，咪睇特利堡排包尾，查實七戰五分，絕對唔失禮，就算相比榜首哈馬比，未計尋晚場波都只係差六分，認真有交代。值得注意係，佢主場四戰係得一勝兩和一負，贏馬模同和哥登堡呢瑞超勁旅，仲要四場主場賽事都有入波，今晚主場受讓，真係幾抵玩！
仲有樣一定要講講，瑞超賽會與各大球會經已達成協議，下季參賽隊數會由現時十四隊增加至十六隊，換句話講就連今季升降班制度都要稍作更改，瑞超將只得一隊降班，而瑞甲升班球隊則會有三隊。對於呢個轉變，特利堡練干尼卡爾遜已經率先表示歡迎，皆因佢話會增加佢護級成功機會，既然大好機會留低瑞超搵銀，你話佢今季會唔會格外搏命先？
