水手自從上月尾五蛋贈大分三神後，氣勢完全沒法擋，繼後四場波三勝一和，直落連贏五個盤，聯賽同日聯盃都通殺，重現久違王者霸氣。主帥早野宏史早排透露大變身秘訣其實簡單不過，請個營養師返照顧球員飲食，班兵聽聽話早睡早起，做番個真正職業足球員，自然易操起狀態。
八鯨傷兵滿營反撲乏力
現時水手中前場主力個個托弗，山瀨兄弟踢到生晒，阿哥功治不嬲係中場指揮官；細佬幸宏近排亦受重用，後上埋門極具威脅。早野頭用人以態行先，大牌射手鈴木隆行冇態照樣棄用，上場日聯盃佢收起正選箭頭大島秀夫同板田大輔，兩人抖夠今場再搏，大軍攻擊點夠多，要屠「鯨」真係冇難度，主Ｗ穩陣，要埋「讓球主勝」都得。
八鯨近排成績急跌，近八場賽事一勝七負，已經連續四場輸波，狀態極沉！究竟衰乜？衰在防線傷兵多囉，季初有史比拉要長抖，早排輪到增川隆洋拉傷大腿，雖然門將楢崎正剛已復出，但根本無補於事。另外，球隊近四場入得兩球，由挪威中鋒科迪莊臣包辦，顯示佢進攻板斧有限，睇都係無力反撲。
三箭弗爆 橫濱等做炮灰
同日廣島三箭會於主場迎戰FC橫濱，三箭三連勝氣勢勇銳，周中收起射手烏士利作客照贏大阪飛腳，今場佢復出同佐藤壽人拍住上，實會狂轟橫濱，主勝亦可一試
