今晚英超利物浦主場鬥米杜士堡，紅軍有歐聯後顧，係小勝格局。紅軍聯賽前四穩陣，班波注意力已去晒歐聯四強戰身上，上仗鬥曼城就顯得懶懶閒，但紅軍於晏菲路始終醒神，撞米堡作客曳極，勒住勒住都可煲魚生粥，今仗主W同「細」都值博。（有線球彩台64周四凌晨3時直播）
自賓尼迪斯執掌之後，利物浦於盃賽特醒，三季以來都聯賽早早失去競爭力，但盃賽就戰績彪炳，前季勇奪歐聯錦標，上季就捧走足總盃，有此佳績，同利物浦季尾聯賽心無旁騖有極大關係。下周中利物浦將於歐聯四強作客大戰車路士，此仗重要性不言而喻，大戰當前聯賽頓成雞肋，對米堡有主場之利，拿仁深信賓帥會收起若干戰將，上仗鬥曼城踢正選馬斯真蘭奴、古積特、懷斯等應會被收起。其實就算「夫添」上陣，紅軍球員都唔會拚盡，鬥曼城一戰有辦你睇，個個都唔搏命，留力歐聯之心昭然若揭。
米堡近四作客冇波入
雖然利物浦心不在焉，但米堡作客戰績實在太曳，到訪晏菲路實難逃一敗。米堡本季十六場作客聯賽僅勝一仗，得九分排聯賽尾四，近四場作客更一球都入唔到，更曾以○比三不敵車路士，就算今仗有「紅軍剋星」維度卡復出，但球隊狀態實在不濟。利物浦憑主場威力足夠小勝；而米堡勢弱難入波，故細盤亦非常好路
