樂比仔人在英國，但仍不忘為大家送上好料，今晚倫敦打戰牌面強弱懸殊，樂比仔愛隊車路士造訪「錘仔幫」韋斯咸，兩隊同樣要爭分，但車路士聯賽八連勝，保持近八百分鐘不失球，王者氣勢重現，為追「魔」圓四冠夢，現階段一分都不能失，客W絕對係可靠之選！（有線英超台63周四凌晨3時直播）
聯賽792分鐘不失球
樂比仔目前身在曼徹斯特市，但心繫倫敦戰事，車路士近期硬仗連場，上周中歐聯完場前險勝華倫西亞後，周日於英足盃同布力般流浪鬥足一百二十分鐘先至晉級決賽，的確係消耗唔少體力。不過「黃金戰車」後備球員級數夠，就算今場派多幾個二線兵落場，照秤仍然高過韋斯咸，況且現時英超已經鬥到最後直路，班球員為力追榜首曼聯，一定會咬牙切齒搏埋落去，呢股鬥心非常驚人，唔驚咬唔入對手。
近期時有批評聲音指車路士贏得拖泥帶水，只要睇番聯賽成績，就知呢個講法唔成立！自一月尾作客輸畀利物浦後，車路士聯賽連贏八場，門將施治更保持七百九十二分鐘不失球紀錄，上場佢於足總盃連番救出布力般必入波，超級門神身價盡顯，加上泰利復出一夫當關，根本無後顧之憂，今場客Ｗ好難會失拖。
韋斯咸輸畀護級對手洩氣
韋斯咸早前曾造出三連勝，護級一度露出曙光，可惜去到上場生死戰六分波先出事，仲係以○比三大敗於錫菲聯腳下，班波踢到比賽末段散晒，呢一場慘敗，大軍難免會有多少洩氣。現時「錘仔」雖然護級仲未絕望，但分數已被前幾隊帶開，形勢絕不樂觀。
另外，球隊升班後三戰「黃金戰車」全敗，今場就算去盡亦只係螳臂當「車」，難有生機！
