今晚西班牙盃四強戰，拉科魯尼亞主場鬥西維爾，拉科聯賽成績差，可以專注爭西班牙國王盃，至於西維爾要應付三線作戰，雖然呢隊波今季以蔗渣價錢，踢出燒鵝味道，但睇未必兼顧到呢項盃賽，平手盤Peter會投拉科一票，由於兩隊防守球員質素唔錯，入球細係更穩健選擇。
輸波賴人明呃班主
上周英足盃四強大敗於曼聯後，屈福特主帥保夫萊特話如果英格蘭足球畀四強壟斷，絕對唔係一件好事，曼城輸完畀阿仙奴後，頭皮雅斯亦講埋同一番話。輸完波講呢晦氣話，實在令人好懊惱，Peter只可以講一句，吃不到的葡萄是酸的！兩位頭無論戰術，用人都好古舊，就算手執四強資源，都未必交到好成績。
愛華頓同保頓班底唔算強，但有好頭帶隊，自然交出好成績，佢從來都唔會講呢晦氣話。如果真係技不如人輸波，乾脆認低威，好過將責任推有錢球隊身上。有麝自然香，如果有好成績，自然吸引到人收購，豐業績好，先引到中東富豪入股，若然冇成績，都係收聲算數。
唔少英倫領隊太自滿，唔好學，足球戰術日新月異，大可用悶功等機會，曉士率領布力般足總盃八強偷雞贏阿仙奴，四強逼到車路士踢加時，呢就係有料，唔似屈福特自暴其短同曼聯對攻，招致大敗收場。所以，輸波咪賴人，唔好用埋咁說話呃圈外人同班主！
