有人覺得不來梅緊周中歐協要對愛斯賓奴，今場波可能玩留力，但實際未必！事關畀盡不來梅贏歐協冠軍，下年咪最多以冕身份打多次歐協，但呢班波目前德甲排第二，只要保持呢個位置下季就可以直接進身歐聯分組賽，更甚者佢不過落後榜首史浩克兩分，有機會聯賽冠軍，一秤之下自然以德甲為重，仲點會留力打歐協？
雲達「迪路」威力驚人
再者不來梅除以六十四球成為德甲入球之冠外，「喪攻王」特別鍾意主場用入波答謝球迷，佢聯賽十五次主場出擊有十次係射入兩球或以上，適逢隊中一對「迪路」孖寶—迪亞高及高路斯齊齊撻，連歐協在內近兩場賽事合共射入五球，有力帶領不來梅今仗再演入球騷。
客軍三連敗失八球
偏偏作客亞琛狀態甚差，近期三連敗兼勁失八球，仲以五十三球成為失球最多球隊，「失波王」當之無愧！加上佢造訪強隊例必腳軟，今季作客史浩克、史特加及拜仁在內聯賽四強之三全部輸晒，今晚去到聯賽二哥不來梅韋沙球場隨時骨頭都無得剩啦
