荷蘭盃今晚上演第二場準決賽，阿爾克馬爾主場鬥ＮＡＣ，講往績阿爾克馬爾今季曾兩勝對手，心理上肯定佔優，但ＮＡＣ聯賽已成例行公事，盃賽係佢唯一目標，決心又比主隊強，各有優勢下羅賓決定改玩入球大細，今場馬會將中位數定為「3.5球」，羅賓對「大」依然充滿信心。（周五凌晨２時45分開賽）
今場表面上係一場強弱懸殊之戰，睇往績阿爾克馬爾贏晒，聯賽兩次碰頭，阿爾克馬爾主場先炒八比一，作客再贏四比一，實力拍埋根本冇得比，不過阿爾克馬爾弊在要兼顧聯賽，依家佢落後燕豪芬兩分，聯賽仲剩兩場比賽，仍有機會後來追上，相比下盃賽當然冇咁重要喇。
ＮＡＣ聯賽排名第十，雖然仲有機會爭踢歐洲足協盃附加賽，但只要成功到荷蘭盃冠軍，一樣可以進身下屆歐洲足協盃，佢近六場聯賽未贏過，已有放棄聯賽、專注盃賽心態，而且今屆晉級路途上，ＮＡＣ先後淘汰燕豪芬、川迪、格羅寧根幾支甲組隊，捧盃決心幾大有眼睇，所以講到戰意，客軍應該贏番一仗。
阿爾克馬爾火力強
既然贏輸形勢唔算太明朗，羅賓建議大家改玩入球「大」，雖然馬會今場將中位數調至「3.5球」，不過睇到佢近三次交手，最少入波次總入球都有五個，而且ＮＡＣ今季聯賽失波多達五十球，阿爾克馬爾又係聯賽入波最多隊伍，今場開「大」有2.05倍簡直係超值
