上星期力奇推介布拉加主場贏塞圖巴爾，結果和波收場，只可說對手塞圖巴爾深受降班危機威脅，唔搶分唔得掂，全場打死守波，布拉加先至冇計攻極唔入。
科大唔愁降班
相對講，力奇估計布拉加今場遭遇反抗肯定冇咁激烈，事關佢今場對手「科大」，家陣排聯賽尾四，未計尋晚葡超戰果，足足高出護級安全線六分之多，依家聯賽已經去到最後四輪，除非尋晚尾二艾維斯同尾三塞圖巴爾同時贏波，否則只降兩隊情況下，「科大」護級壓力根本唔算太大。
事實上，布拉加自己都一樣等住搶分進軍歐洲賽，今季佢歐協初嘗甜頭殺入十六強，搵埋搵埋唔少，下季梗係想食住條水繼續搵銀。依家佢排第五，只係得失球壓住同分第六位球隊費利拿，有乜依郁就會畀人搶走張歐協入場券，試問佢今晚點會想作客失分呀？
最後，畀多個超強數據大家，兩隊波近六次交手，布拉加總共係取得五勝一和，而單計近年四次作客「科大」，布拉大加都係取得兩勝一和一負，擺明「格食格」食硬你，讓波少梗要捧捧場啦！
