雷丁升班首季總算企穩英超，近排更連贏兩場，如果今晚贏埋仲可以進佔第七位，保持參加來屆歐協機會，不過領隊郭甫賽前就突然表態，話唔想競逐來屆歐洲賽，自認雷丁根本未夠斤作雙線發展！換句話講，即係叫班球員今晚流攤！呢位領隊賽前仲話好驚紐卡素奧雲今晚復出，認真船頭驚鬼船尾驚賊，不過咁又難怪，事關朱楓賽前收到風，雷丁今場都有幾多主力唔出得，包括隊長梅迪、格連列圖、干維、辛高同列達，實力都真係削弱唔少。
對家紐卡素，今晚或有養傷多時奧雲同艾美奧比復出，當中領隊盧達更指奧雲仔目前狀態，比起當年由皇馬加盟陣仲弗，奧雲仔聽到，分分鐘加多兩錢肉緊都唔出奇。仲有喎，一直以為自己「喜鵲」玩晒馬田斯，為免風頭被搶，今晚肯定會全力爭取士哥！
紐卡素卡士贏晒
再講，就算冇奧雲，「喜鵲」本身條中場線都極富創造性，相比起雷丁一條工兵型中場，入球本錢都相對較高。加上近排紐卡素一對中堅巴布爾同史提芬泰萊漸入佳境，上場都守得住車仔，今晚對住次一皮雷丁，如果守唔住真係要搵老廉跟一跟佢！呢鋪紐卡素受讓平半仲要高水，仲唔係抵玩到震？
