由剛過去周末開始，無論足、籃球都係好戲連場，本地、歐洲同美國都有好波睇，英格蘭足總盃決賽、本地足總盃決賽同NBA等大戰輪住上演，對於Peter呢類球癡講，唔使講實會犧牲覺時間，都要睇晒所有賽事，絕對過足晒癮！
其實Peter一向唔介意擂台榜排第幾，最重要係懂得尋找出擊時機，調動大細注碼，適當時候押重注，咁先有機會贏到錢，如果不論任何時候，日日都選擇買大注，淨係輸水已經輸死。睇番今晚有兩支球隊，齋玩鬥志已經值回票價，結合埋兩隊實力，絕對值得押重注，巴塞隆拿同皇家馬德里都要爭標，兩隊今晚分途作客出擊，肯定絕不客氣！
巴塞皇馬炒埋一碟
皇馬自碧咸加盟後已經失落聯賽錦標多年，一心要今季重奪冠軍，球隊上下好恨捧盃，鬥心非常頑強，今晚作客維爾瓦贏面極高。至於巴塞隆拿上季雖然稱王稱霸，但球場係英雄地，球迷好現實，如果球隊今季到最後四大皆空，之前所建立悅目進攻足球典範，全部都冇晒意思，為保強隊聲名，巴塞今晚作客馬德里體育會，將會搏到盡，值得睇高一線！
其實賭波道理亦係一樣，之前中幾多都係冇用，最重要係今日，皇馬同巴塞都係實力同鬥志兼備，呢條二串一過關係Peter今日心水，絕對可以大注出擊
