甘美奧今屆南美自由盃演出異常出色，先分組賽以C組首名出線，到十六強更擊敗上屆亞軍聖保羅晉級，去到上圈八強，更首回合落後兩球之下，返主場收復失地，兼最後階段互射十二碼擊敗迪芬沙士砵亭出線，盡顯王者本色。
翻查數據，原來甘美奧踏入○七年後，總共主場踢過十七次，結果獲十五勝一和一負佳績，最近十次主場更全數奏捷，勁入二十二球只失兩球，名副其實係地頭龍。況且，季前新加盟四位新兵，包括門將沙查、中場迪亞高蘇沙，兩位前鋒阿武羅素及杜達依家都已經企穩正選，雖然阿武羅素今場要停賽，好在甘美奧集地利同人和兩大優勢於一身，想首回合贏波打響頭炮又有幾困難呀？
山度士對賽往績輸蝕
今屆自由盃唯一一支分組賽以全勝姿態出線山度士，自從巴甲開幕後就跌晒Watt，直至日前險勝帕拉尼恩斯先聯賽開齋，而自由盃淘汰賽階段表現亦冇分組賽時咁勁，無論十六強定八強，兩回合計加埋都係僅以一球之差淘汰對手出線，可見山度士狀態只係麻麻，再加上近五次作客甘美奧輸足四場，連往績都輸埋你話仲點捧得落手，吼實主勝包你有錢剩
