今日國際熱身賽獨腳戲，蘇格蘭作客奧地利受讓平半屬筍盤，但觀乎兩軍陣容、實力、戰意，入波唔會多，「細」亦要兼顧。客軍傷兵滿營加上要應付歐國盃外圍賽，唔失波保不敗免傷士氣已足；主隊鋒將唔夠級數，難破對手硬淨防線，吼實細盤冇壞。（周四凌晨2時30分開賽）
奧地利於○八年將與瑞士合辦歐國盃決賽周，主辦國身份毋須打外圍賽，故經常搵對手拍跳準備大戰。奧地利已同大賽無緣多年，若非今次屬主辦國，相信亦難以參加歐國盃決賽周。
奧地利足球積弱已久，現時陣容僅屬歐洲三流，今次入選者以國內球隊薩爾斯堡、馬特斯堡、格拉茨球員為主，再配以弗賴堡後防伊巴斯貝加及凱沙羅頓門將馬曹等德乙戰將充撐場面。
奧地利鋒線極度疲弱，最當打古積同連斯，分別來自瑞士超球隊錫永同葡超博維斯塔，二人國際賽經驗唔多，而佢老大哥夏斯於剛過去球季為格拉茨僅入四球，實難對蘇格蘭防線有所威脅。
蘇格蘭殘陣都夠砌
近六場國際賽事，奧地利雖然僅輸一場，但三場贏波兩個對手為千里達同列支敦士登，另一場贏瑞士僅屬「畀面派對」，後者只係畀番面子主辦國兄弟而已。
蘇格蘭今仗縱有堅尼米拿、麥法頓、奇治比亞堤、派士利等好手缺陣，但後防仍有正選華亞、尼史密夫、格拉咸阿歷山大等壓陣，而且巴利費格遜、費查及基斯保迪等中前場球員，級數都遠勝主隊殘兵，受讓好路之餘，兩軍鋒線又唔強，入球細都要得過
