有獎金，邊個唔鍾意？黑山今日麒麟盃第二場賽事對住哥倫比亞，要捧「讓球主勝」，事關麒麟盃亞軍同季軍獎金差一截，佢唔會放軟手腳，何況黑山成為國際足協會員國，為錢為面唔想再輸，哥倫比亞以試陣為主，靠唔住！（開賽時間：周日中午12:15）
先講賽制，麒麟盃得三場賽事，頭場日本淨勝黑山二比○，剩低兩場係黑山對哥倫比亞，日本對哥倫比亞，換句話講，假如黑山唔想包尾，呢場點都要出十二成功力爭勝，撞佢上周五正式成為國際足協第二百零八個會員國，咁值得紀念大日子，唔通甘心隨便兩連敗，專程到日本遊埠咩？
哥倫比亞志在試陣
再講，麒麟盃冠、亞、季軍獎金分別係十萬美元（約七十八萬港元）、五萬美元（約三十九萬港元）、一萬美元（約七萬八千港元），既然黑山冠軍機會凍過水，起碼都想執番五萬美金過癮，佢國內球員人工好奀咋。仲有呀，黑山對日本演出其實唔算太差，羅馬射手胡仙歷亦有正選上陣，如果唔係隊長貝辛奴域下半場射失十二碼，至少唔使捧蛋。
唔可以唔提係，黑山唔需要應付歐國盃外圍賽，全隊根本無任何包袱可言，相反，哥倫比亞要備戰就快舉行美洲國家盃，十八人大軍有好多都係年輕球員，淨係得後防哥度巴、耶比斯、佩利亞出得大場面，試陣味道好濃，根本唔似強陣出擊，即使佢近六場有五勝一負都信唔過，捧對家
