人民幣升值，唔代表國家隊都會好！中國隊明早熱身賽作客美國，始終係捧對家數，事關中國隊到美國比賽例牌冇運行，加上兩個全能重心鄭智、孫繼海冇隨隊，牌面難免弱上加弱，何況美國領隊巴特利賽前話，經已睇晒比賽錄影帶吼路，有望開出「讓球主勝」益街坊。（開賽時間：周日早上8:00）
近5次訪美1和4負
除鄭智、孫繼海缺陣，中國隊仲有中場邵佳一、左閘孫祥受到唔同程度傷患困擾，即使消息話佢應該趕得切上陣，恐怕都好難有料到，何況中國隊近七場熱身賽得兩勝一和四負，對上五次到美國比賽得一和四負慘淡收場（包括對球會），話就話仲有李鐵、董方卓兩個外流球員壓陣，但點信得過！
仲有呀，備受炒魷壓力中國隊練朱廣滬就話，好擔心球員適應唔到聖荷西時差，聽落根本唔似有信心威。
美國為遷就聯賽，並無召入當路雲為首美職球星，但就有比士利、丹普西、保卡尼加、史碧達、侯活五個英超球員擔大旗，二十三人大軍有十三個有份踢緊美洲金盃，領隊巴特利仲專登搵中國隊比賽錄影帶吼路，主場唔似會流攤。
