雖然力爭緊三冠王西維爾今晚全西班牙歐協決賽被睇高一線，但力奇深信心無旁騖蓄銳一擊「賓佬」愛斯賓奴，至少可以保得住九十分鐘不敗。事實上，近四次愛斯賓奴對住西維爾有七成半不敗，加上後者仲要有後防主力艾斯古迪停賽，今場梗係博「讓球主勝」啦！（有線61、泰星U3台及廣東電視體育頻道周四凌晨2:45直播）
呢場歐協決賽中立場蘇格蘭格拉斯哥咸頓公園上演，對兩班西班牙波講其實都冇數或者蝕底可言，但力奇睇番兩隊波近兩季四次交手，除上月底聯賽場波，愛斯賓奴冇乜好爭情況下輸一比三之外，其餘三場愛斯賓奴就取得兩勝一和，格食格力奇梗係信愛斯賓奴啦！
彭迪安尼弗到爆
咪睇西甲個聯賽排名愛斯賓奴低過西維爾一截，查實如果齋論今屆歐協演出，愛斯賓奴反而係較好一隊，淨係睇準決賽一輪，愛斯賓奴主客場兩勝雲達不來梅，點都秤先過同奧沙辛拿各贏一場西維爾。再講，愛斯賓奴仲係今屆歐協進攻王，十四場入三十二球，就知佢唔講得笑。
仲有，為備戰今場賽事，愛斯賓奴上周末就收起半隊主力聯賽鬥皇家馬德里，點知半力出擊佢，淨係魯費迪加上歐協神射手彭迪安尼就搞到皇馬後防亂晒龍，其中「老彭」仲整個帽子戲法，以佢家陣腳風大順，轟番西維爾一、兩球有幾難先？
西維爾方面，除爭做歷來首支西班牙三冠王之外，佢仲爭取做繼一九八六年之後，首支冕歐協盃冠軍球隊，班球員壓力都咪話唔大呀！但令人擔心係，佢除艾斯古迪停賽之外，查維拿華路都只係大傷風好番，射手簡路迪又成日話受鼠蹊傷患困擾，落到場踢唔踢得出最佳水準都話唔埋
