今晚歐洲足協盃決賽上演「西甲內訌」，由西維爾撼愛斯賓奴，預料會係一場節奏明快，毫無冷場賽事。以往盃賽決賽，雙方因為唔熟對方路數而畏首畏尾，但西、愛兩軍每季於聯賽、盃賽交手多次，對彼此波路、踢法、板斧都熟到爛，故預計一開波就會進入戲肉。
兩軍於西班牙地理位置好接近，今次舟車勞頓情況差唔多，所以實力上分野將會決出高下。西維爾本季以「蔗渣價錢，踢出燒鵝味道」，領隊桑迪拉莫斯手一批二線兵，卻成功將佢潛能引發，踢出佳績。
丹尼爾右路打晒骰
Peter最欣賞右閘丹尼爾，呢位巴西翼效率驚人，成條右路一個打晒。中場連拿度傳射俱佳，再加埋近況大勇馬利斯卡同工兵保臣，西維爾中場配搭好平均。前鋒線簡路迪、基沙哥夫等又大熟大勇，呢班波踢法全面，進攻點分散全隊，愛斯賓奴應該難以招架。
其實西維爾本季已經超額完成，聯賽係皇馬及巴塞天下，守住第三位已經唔錯，佢較實際目標係成為足協盃、西班牙盃雙冠王。Peter睇好佢可以達成呢個願望，但來季就難以維持，因為一眾功臣季尾多數會畀人撬走，所以西維爾班球員一定搏盡尾彩，留番個美好回憶。
