山度士雖然被視為今屆南美自由盃奪標熱門之一，但近期無論盃賽同巴甲都唔多夠霸氣，上圈面對委內瑞拉弱旅卡拉卡斯都幾乎出事，聽朝自由盃八強首回合，造訪主場惡到爆墨西哥球隊CF阿美利加，相信唔容易保住不敗，平手盤撐硬主隊。（開賽時間：周四早上8:45）
山度士於巴甲揭幕戰前夕事先張揚，表明因備戰自由盃八強首回合大戰，將會作客利斯菲體育會聯賽收起大部分主力，結果聯賽一開鑼就出師不利三分盡失，不過最終以一比四呢個恥辱性比數不敵升班球隊利斯菲體育會，又似乎太過離譜。
山度士上圈幾乎出局
其實山度士唔單止聯賽演出令人失望，自由盃上一圈淘汰弱旅卡拉卡斯亦唔夠說服力，兩回合計僅以五比四淘汰對手，氣勢實在難與分組賽六戰全勝時相提並論。
來自墨西哥CF阿美利加，上圈首回合主場大炒智利高路高路三球之後，次回合作客又輸番一比二，雖然唔排除有流之嫌，但睇都係典型地頭蟲，今仗首回合主場先出擊，當然唔會有任何保留，其實計埋本土賽事，阿美利加主場已經連贏七仗，主場威力有目共睹，平手盤坐和望贏！
