度士同好多波友講開英超，唔少人覺得曼聯今季重現「三冠王」氣勢，今晚曼聯主場鬥米杜士堡，要過呢關應該唔難。雖然話下周中要歐聯四強對ＡＣ米蘭，但曼聯近期個勢實在太強，米杜士堡拍埋去好蝕底。曼聯贏就梗，嫌主Ｗ太熱的話揀個「讓球主勝」都好合理。（有線英超台63周日凌晨零時15分直播）
曼聯近三場連勝都有直播，一共入十三球咁多。曼聯前面識入波，對於揀「讓球主勝」係一個好好支持理據。而近期最令度士有印象係卡域克，佢個位好難踢，太前顧唔到防守，褪得太後又同前場失聯繫，但最近幾場卡域克走位方面掌握得相當準，上前有士哥之餘又不失與後防聯繫。卡域克進步可謂曼聯之福，今晚對米堡又係由佢先開紀錄的話，度士都唔覺得奇。
米堡近六場輸五口
米堡成日都食住曼聯，因為以前有麥卡倫執，話晒佢都做過曼聯「巴吐」，對於曼聯領隊費格遜個心諗乜都一清二楚，要防曼聯自然唔難。不過依家米堡由修夫基執，功力同老費相比差一大截。況且米堡近期個勢都幾差，連同盃賽以及聯賽，近六場贏一輸五，當中唯一擊敗對手係屈福特，咁績點揀得落呀！
