雖然皇馬有碧咸傷愈處理罰球同傳中球，增加進攻瓣數，不過佢有中堅希古拿、後防美查亞要坐波監，加埋三名左閘卡路士、米基爾托利斯、巴禾同樣有傷在身，意味今季好少上陣馬些路、沙加度要擔大旗出任左右兩閘，後防默契難免受影響，點睇都信唔過。
「蝙蝠」對賽唔輸蝕
除此之外，估計沙治奧拉莫斯亦要返到中路同簡拿華路合作，呢個組合季初已經證實失敗，如果唔係，當時練卡比路邊使向現實低頭，放番希古拿出雪櫃？大家知啦，「蝙蝠」華倫快速反擊出名勁，兩翼祖亞昆、大施華亦好弗，依照皇馬呢個左執右執後防陣容，實在好難保得住清白。
對家華倫依家落後第三位皇馬一分，今場贏波全取三分話，甚至有條件追趕第二位西維爾，計球員戰意絕對唔需要擔心。
再講，華倫近四次對皇馬有一勝兩和一負，完全唔蝕底，最重要係佢隊長艾比達好有機會傷愈復出，拍番住艾比奧爾做中場攔截，有佢睇住後防就唔使咁驚青，中堅馬真拿停賽都冇問題！
