富咸上仗作客雷丁前炒高文魷魚，由北愛領隊山齊士頂到季尾，一眾行家都認為係明智決定。北愛爾蘭早兩年仲係死死，但近年山齊士帶領下屢創佳績，主場爆冷贏過英格蘭同西班牙，現時歐國盃外圍賽F組排榜首，張成績表靚到震，雖然之前球會最叻都係帶領低組別韋甘比打入足總盃四強，但當地一眾行家都認為佢可以成功帶領富咸安全過渡，呢消息畀到樂比好大信心。
布力般已有收咧feel
雖然山齊士上仗首度領軍富咸即刻輸畀雷丁，聯賽不勝場次增至八場，但富咸整體表現比起早兩場輸畀愛華頓同曼城已經好好多，兼且富咸餘下四場賽事中，有兩場要對住阿仙奴同利物浦，煞科戰則作客米杜士堡，橫睇掂睇都係呢場對布力般最有機會搶三分，難怪班行家都話富咸今場決心大，連後羅仙尼亞都話今仗係全季最重要一役，點可以唔跟先！
布力般於足總盃四強好唔抵咁出局，樂比認為佢今季已經玩完，雖然領隊曉士仲話要爭足協盃資格，但呢官方口逃唔過樂比法眼，睇班波上仗贏屈福特三比一下半場演出，球員已經有收咧feel，咁鬥心，作客點同搶分護級富咸砌呀？
