季前不少球迷覺得曼聯增兵失敗，只加入中場卡域克及門將古斯錫，人腳未足以爭標，但係佢表現出色，現時仲有機會做「三冠王」，似乎係意料之外。不過，打波最重要係落場球員肯搏，費Sir識得用牡丹配綠葉，返璞歸真，信賴球員，成績自然理想。
另一方面，韋斯咸今季多新球員，有時兵源太豐富未必係好事，因為好容易產生摩擦，落場球員怕踢得曳，後備兵又妒忌正選球員，好多球員因為位置重疊，令球隊運作唔夠暢順，搞到作繭自縛，來季大有機會降落英冠作賽。大家只要將兩隊拍埋，就可以分出高下。
計級數高過錫菲聯
如果《東方波經》讀者有睇開《蠱波擂台陣》，都會發現Peter近日不時押重注。由於臨近季尾有好多生死戰，唔少球隊戰意鮮明，只要大家心水清，揀有實力球隊，自然可以作重錘出擊。Peter今日重點推介係查爾頓，球隊級數高過錫菲聯，目前主Ｗ分頭唔錯，值得捧場。
其實查爾頓現時身處險境，只因季初主帥古比士利離隊，而會方用錯有勇無謀頭杜維，令球隊陷降班危機。陣中球員近季已證明能於英超立足，講班底絕對唔弱。此外，主帥柏杜功力亦比錫菲聯領隊禾諾克好，憑住戰意及主場之利，Peter認為佢有能力贏波，最後逃出生天。
是日金句
返璞歸真永遠比作繭自縛好
