今晚德乙戲碼唔錯，由「兩巨頭」交手，羅斯托克主場對卡爾斯魯厄。卡爾斯魯厄雖然德乙超晒班，不過今次唔可以太高估佢，事關呢支榜首球隊現時升班前途一片光明，一眾球員開始有鬆懈象，加上作客水準非常飄忽，小峰今場睇好羅斯托克可以乘機剃「一哥」眼眉。（周二凌晨2時15分開賽）
卡爾斯魯厄依家領先羅斯托克有五分之多，餘下比賽如無意外，應可穩奪升班資格。可能大家會覺得，如果卡軍今場輸波，榜首之位會受威脅，不過小峰反而認為卡爾斯魯厄並唔會在乎，因為次級聯賽球隊目標只係升班，是否以第一位過終點並唔重要，頂級聯賽球隊爭冠鬥心，唔適用卡爾斯魯厄身上。
卡爾斯魯厄作客飄忽
而且卡爾斯魯厄歇冬之後，作客表現麻麻，對上一次作客，就吞實力平庸1860慕尼黑兩蛋，今次到訪今季聯賽主場僅一敗羅斯托克，小峰更加睇唔到卡爾斯魯厄有乜贏波理由。
相比卡爾斯魯厄輕鬆應戰，羅斯托克升班席位仲存有暗湧，杜伊斯堡、弗賴堡、凱沙羅頓、甚至格雷特霍夫，都有權取得升班資格，羅斯托克根本冇本錢鬆懈。
首循環羅斯托克作客當時如日方中卡爾斯魯厄，上半場落後三球劣勢之下，都可以成功逼和四比四，今仗返回主場絕對有力擊敗銳氣不再卡軍
