般尼季初表現神勇，一度殺上榜首，但踢兩三個月即打回原形，去年十二月至今年三月期間，更造出十八場不勝劣績，打破球會百年紀錄，但當球會向領隊哥達維發出最後通牒後，般尼突然四月翻身，五場賽事取得四勝一負成績，唔單只三場主場贏晒，作客仲爆冷贏伯明翰，狀態之佳拍得住季初，西布朗呢個時候撞正般尼，注定佢唔好彩。
般尼雖然冇好爭，餘下三仗僅屬例行公事，但哥達維早已表明以爭取較高名次為目標，剩番幾場賽事亦會觀察球員表現，決定下季組軍方向，球員為博一紙合約，自然唔敢「流攤」。
西布朗穿窿讓唔起
依家排第五位西布朗，雖然要為升班附加賽而努力，但唔代表一定會贏，睇番西布朗近九場賽事，僅得二勝二和五負劣績，自從隊長居迪斯戴維斯受傷提早收咧後，西布朗成條後防線即刻散晒，今場仲有兩名主力基文特同卡達停賽，陣容不整下，拿仁估計佢最叻都係一分，試問豈有資格讓波。既然般尼對上六次主場對西布朗，有四次開一比一呢個波膽，不妨再追多鋪。
