西甲聯賽前列同護級形勢緊湊，大家揀波唔使盲摸摸，捧有鬥志兼有主場之利球隊就掂，今晚薩拉戈薩主場對畢爾包，連仗失利薩拉戈薩為爭歐聯資格，要贏弱旅畢爾包難度唔大，主Ｗ穩陣。（有線足球台61周日凌晨４時直播）
薩拉戈薩近期表現有下滑象，近三場僅得兩分，上仗輸畀華倫西亞，更係對爭奪來屆歐聯資格一大打擊。球隊現時排「梗頸五」，落後第四華倫七分之多，聯賽尚餘四輪，想踢歐聯就要加把勁。
上場對華倫所見，薩拉戈薩表現唔算差，最可惜係早段失波在先，落後兩粒踢，球隊反而回復本身水準，%26#63196;住華倫攻，度士睇得出，薩拉戈薩班球員仲好有鬥心。
三場不勝一定搶韁
由於薩拉戈薩近三場未贏過，度士認為以佢實力，亦係贏波交代時候，而今場對畢爾包，更有烏拉圭右閘迪奧高停賽後復出，加上主場之利，主Ｗ有把握。
客隊畢爾包近四場未贏過，近兩場都和波而回，其「一分政策」心態甚為明顯，但可惜作客係佢弱項，除上仗作客摸和維爾瓦之外，對上兩場作客分別以一比四及四比五不敵西維爾及桑坦德，作客失球率排第二，僅少過榜尾塔拉戈納，畢爾包今場要搶分好困難
