一個練等住接大信封，邊有心情帶領球隊贏波？禾夫斯堡今晚德甲主場迎戰雲達不來梅，就要面對呢個問題，事關禾夫斯堡高層決定解僱練歐真泰拿，邀請馬圖斯加盟領軍，既然不來梅要贏波搶奪歐聯直接參賽席位，戰意比較鮮明，客W當然抵玩得多。（有線63周六晚9:30直播）
依家禾夫斯堡分別領先亞琛、緬恩斯三分，得失球差贏足九條街，除非佢呢場輸十幾球，否則乜都唔使怕，高層亦開始正式放風搵新練。
由於前拜仁慕尼黑練馬加夫已表態講到明無興趣，故禾夫斯堡近日再將目標移向前德國國家隊隊長馬圖斯，就連體育總監都話要換埋，正式係七級大地震，軍心肯定受到動搖啦。
另一方面，不來梅落後第二位史浩克兩分，數字上仲有機會爭奪下屆歐聯直接參賽席位，成功話，球員就唔使犧牲自己假期、提早歸隊備戰打外圍賽，幾爽！
主隊近六場不勝
再講，禾夫斯堡近六場得兩和四負，後防狂失十二球，好似穿個窿咁，大家知啦，雲達不來梅向來以火力強勁做賣點，咁形勢仲唔嗒糖咩，唔通佢忍受到連埋盃賽在內近五場得一勝四負成績咩？似乎歐真泰拿想搶分風光離隊，睇怕都好難囉。
