目前熱刺以五十六分排聯賽榜第六，今晚一贏，就可以夠分數提前一輪保住前六名，肯定取得來屆歐協盃參賽權，唔使問阿貴，戰意梗係一流啦！有人會問熱刺周一先贏查爾頓，今晚又踢體力會唔會有問題呀？朱楓百分百放心，事關傷一段時間加特拿同伊高圖今晚可以隨時候命，再加上賀森加利、馬白蘭基、泰尼奧同迪科爾等後備兵都屬於國腳級，就算熱刺踢到尾段莫氣亦有足夠兵力調換！
布力般作客往績差
順帶一提，熱刺一對「白雙煞」貝碧托夫同羅比堅尼因上個月合共轟入八球，開季至今夾手夾腳幫球隊聯賽入成二十一球，結果起孖齊齊當選英超四月份最佳球員，今晚有佢前線數胡，布力般門將費度肯定頭都大埋！
布力般近排都醒，四戰得三勝一和，不過朱楓略嫌佢贏對手唔係屈福特同查爾頓呢降班分子，就係等抖暑紐卡素，再講，布力般近六次作客熱刺只得一勝一和四負，明顯處於下風，今晚想搞寸熱刺開Party，No Way！一於「向歐協出發」！
