今晚西班牙盃四強次回合賽事，巴塞隆拿帶住三球優勢作客基達菲，大有條件流攤，留番班主力搏聯賽，所以嘉輝睇好主隊可保不敗，但馬會冇開讓球盤同讓球主客和，到底會開主勝定和局，實在好難估。基達菲主場防守力極強，既然諗唔掂主客和，不如改玩入球細。（有線足球台61周五凌晨3時直播）
首回合巴塞以五比二大炒基達菲，如果大家唔善忘，應該仲記得美斯仔入個世紀金球，嘉輝睇到如癡如醉，認真好波！不過，嘉輝度奉勸大家唔好對次回合有太大寄望，因為巴塞領先緊三球，聯賽又同皇馬鬥到叮噹馬頭，所以頭列卡特今場肯定收起大部分主力，如果想捱夜睇美斯同伊度奧，都係疊埋心水睇下場聯賽。
西班牙盃場合又係巴塞後備Show time，莫達、古利同古莊臣等二線兵排住隊出場，門將亦會用西班牙盃正選佐基拉，戰鬥力坐底打個七折。由於防線有馬基斯同比列堤養傷，調動空間唔大，所以今場殘極都有個譜，加上要保住領先優勢，所以唔敢玩得太放肆，防守力仲有番咁上下，想W埋就難。
基達菲守強攻弱
基達菲落後緊三球，今場點都會略盡棉力追，但以佢疲弱攻力，要反先確係幾難，但求小勝番場個尾彩。基達菲主場防守力冠絕西甲，聯賽主場十七戰只失六球，呢個絕對係一線球隊成績，今次對住巴塞二線攻擊球員，當然有力保住不失，入球細捧得過！
