三日前熱刺作客查爾頓，當日樂比已經熱捧佢可以贏波，結果冇令樂比失望，順利取得贏波三分。該仗熱刺佔得壓倒性優勢，查爾頓全場冇真正威脅過熱刺，所以就算面對頻密賽程，熱刺都冇有怕。
前鋒刺客弗到震
目前熱刺同布力般分別得五十六及五十分，同時都有爭來屆足協盃參賽資格機會，但只要熱刺今仗贏波，就可以達成目標。事實上，熱刺對歐戰資格非常重視，本屆足協盃出局後，就全力聯賽力爭上游，近十場聯賽七勝二和一負，狀態一流鬥心又夠，仲有一場就可達標，一定咬緊牙關搏埋佢。樂比早幾日都講過，熱刺最犀利係其攻力，贏查爾頓就靠貝碧托夫同迪科爾一人一粒，佢兩個加埋羅比堅尼弗到震，勒都勒唔住。
布力般話就話仲有得爭足協盃資格，但事實上分數已被拉開，預計領隊曉士都唔會強求。佢近四仗三勝一和，狀態不俗，但球隊近八次作客僅贏兩仗，而且近三次去到白鹿徑球場輸兩次，今仗難阻對手進軍歐洲。
