4強形勢及足智彩奪標賠率
上一圈「紅魔鬼」奧脫福大破意甲羅馬七個一皮，照牌面睇主場再砌AC，本來應該唔難贏波，不過隨住近排佢傷兵加劇，成條防線家陣有里奧費迪南、尼曼查維迪、加利尼維利、施維斯達同艾拉有傷，擺出條防線就變係費查、布朗、奧沙同軒斯，無論組織力、破壞力同技術全部唔夠班，呢條紙紮防線要守得住由卡卡帶領AC鋒線，力奇確實有懷疑。
AC往績食住紅魔
更嚴重影響，自然係曼聯條勁爆鋒線。冇錯，基斯坦奴朗拿度同朗尼等中前場近排都係狀態「托弗」，但如果球隊有後顧之憂，要佢分心參與防守，相對講，進攻發揮亦都會打上折扣添。
同曼聯上周末打甩髀都失分唔同，士氣高昂AC，上場出半力都贏卡利亞里，氣勢已經唔差，最重要係陣中包括馬甸尼、卡卡同基拿甸奴等至少七個主力，當日都係高掛免戰牌，全力備戰今鋪，擺明有備而想搏首回合，仲要有正選門將迪達及時復出，點睇都唔似輸得喎。
除兩班波人腳之外，力奇仲發現原來近年AC都係食住「紅魔鬼」，○五年歐聯兩次交手，AC都係贏一比○收場，就算係○四年踢友賽，都係和波收場，「紅黑兵團」似乎真係「剋」住「紅魔鬼」，試問今場唔撐點得？
