歐聯四強首回合大戰，「受傷紅魔鬼」曼聯難捉「老狐狸」AC米蘭。主隊後防傷兵嚴重，一對中路守將里奧費迪南、尼曼查維迪齊齊缺陣，防守力受削必影響整體發揮。客軍大賽經驗豐富，食腦踢法足以算死對手，作客受讓平半值得捧場。（now 684周三凌晨2時45分直播）
若計本季表現，曼聯的確鋒芒畢露，Ｃ朗瘋狂爆發、朗尼亦乘時而起，其餘一眾老嫩中場亦大放異彩。進攻球員搶眼，但後防重要性亦不能忽視。
一對中堅里奧費迪南及尼曼查維迪合作得絲絲入扣，今仗呢對拍檔齊齊因傷缺陣，施維斯達、基蘭李察遜受傷唔出得，加上加利尼維利同艾拉未傷愈亦難趕及上陣，一對副選奧沙及布朗要頂硬上守住中路，右閘更須由費查客串，再加埋「計時炸彈」軒斯，條防線令人難有信心。拿仁深信每一支成功球隊，都係建基於穩陣後防之上，依家曼聯防線天殘地缺，對ＡＣ都幾牙煙。
ＡＣ作客穩陣少失波
經過「電話門」事件重創後，ＡＣ季初的確元氣大傷，但經過半年調整，今年「紅黑兵團」已經番信心，一眾主力如派路、加度素、尼斯達逐漸上力，再配合一路有水準卡卡，上圈作客拜仁都以兩球輕取對手，戰鬥力毋庸置疑。
曼聯上仗歐聯大炒羅馬七比一，ＡＣ同羅馬雖同係來自意大利，但打法、內涵截然不同。ＡＣ靠防守起家，風格穩打穩紮，唔會好似羅馬咁蠢奧脫福同曼聯對攻。本屆歐聯ＡＣ五次作客，有四次可力保不失，證明ＡＣ防守力絕對經得起考驗，加上陣中擁有多員歐聯冠軍，甚至世界盃冠軍成員，經驗成為同曼聯拗手瓜最大武器，今仗就算贏唔到，至少可以保住唔輸，受讓之下捧佢下盤，實在係正路之選。
