正所謂兵不厭詐，車路士領隊莫連奴話明今晚主場鬥曼聯時，會列隊歡迎呢支新任英超盟主進場，之但係力奇好懷疑佢係咪真係咁順攤送埋場波畀「紅魔鬼」，自己地頭認低威。何況曼聯近四次去到史丹福橋球場一球都未入過，今勻車仔只係小讓平半，一於捧上盤博車仔贏波尾彩啦！（有線63、泰星U39台及廣東電視體育頻道周四凌晨3:00直播）
其實聯賽已經冇好爭，力奇估計雙方都會派部分副選上陣，等班主力準備呢個月十九號場足總盃決賽，之但係論雙方後備力量，車仔班好似布歷治、沙洛文卡勞同胡禮菲臘斯等，點計都應該高質素過曼聯費查、基蘭李察臣同阿倫史密夫少少。
車仔主場不敗後備勁
再者，車仔上仗鬥阿仙奴時其實已經開始輪換制，好似有輕傷在身杜奧巴，已經宣布提早接受鼠蹊手術舒夫真高，同老將馬基列尼已經獲得休息機會，其中後者今仗就有機會重返戰陣。相反，曼聯上周末仲係搏緊場曼徹斯特打，主力好似基斯坦奴朗拿度、朗尼、傑斯同史高斯等都係未抖過，費Sir如果揀呢鋪畀佢抖抖，又有乜出奇先？
仲有，唔好話力奇心地唔好諗埋蠱惑，莫連奴口口聲聲話列隊恭迎曼聯踩場，查實佢今季備受班主阿布拉莫域壓力，贏唔到英超已經難交代，你話今晚主場都輸波話，季尾畀人炒都冇得怨啦！所以力奇估計，莫帥今鋪隨時只係示人以弱，落到場先同你見真章。
咪話力奇唔提你，車仔今季聯賽主場十七戰一場都未輸過，近五次主場鬥「紅魔鬼」又係從未失手，其中近四次曼聯仲要係波都未入過一粒，捧車仔上盤輸半博全，點計都係抵玩少少。
