ESPNnow寬頻電視獨家直播歐聯四強次回合激戰，AC米蘭主場惡鬥曼聯，AC焗攻，對住氣勢超勁曼聯，邊有可能話贏就贏？紅魔鬼作客做好防守本分，發揮快速反擊，最低限度可以摸和主隊躋身決賽。
歐聯到四強階段，雙方都肯定會比較謹慎，紅魔鬼「魔性」大發，連續歐聯同英超兩場比賽踢出懾人氣勢，後上砌低AC同愛華頓，球員一定要有超乎常人贏波決心，先至能夠踢得出呢股氣勢，可想而知家陣曼聯球員晒火，AC呢個時間要做攔路虎？梗係好難啦！
再者，曼聯封王英超基本上好穩陣，最大原因係費格遜將「進攻便是最佳防守」原則發揮到淋漓盡致，對付AC同愛華頓就係最佳典型例子，最重要係朗尼有番晒射門觸覺同信心，配合C朗前線攻擊，無論速度、射術同默契都一流，有效抵銷後防所承受壓力。
AC上場留力都砌低拖連奴，球員狀態冇問題，最重要係體能唔能夠頂到完場先？佢奧脫福畀曼聯放到莫氣，結果臨尾香，假如呢場繼續玩對攻話，睇怕AC贏埋都唔夠後面輸。
